One day

People would lie, cheat, deceive, or betray. People would break promises. People will leave; maybe for good, maybe not.
You would suffer from heartaches, and might not bear the pain. You would get disappointed, and might lose interest in life.
But one day, one day you'll wake up with all the bitter moments in vain; no hate, no regrets.
One morning you'll be reborn; with pure thoughts, intentions, and serene heart.
You'll only remember the good deeds, the heart to heart talks, the tears of joy, and genuine smiles.
You'll appreciate all the blessings you have; be grareful for those who stood up for you, and never gave up on u.
One day, one day you'll be set free.

فجأة لقيتني مبسوطة

أجلس وسط الزحام لا أبالي بمن حولي..نسمات الهواء تداعب وجهي...
أستمع اليها تشدو بأعذب الألحان، فتأخذني بصوتها الى عالم اخر...عالم أنقى.. عالم يترفع عن ثرثرة البشر...
ارتشف قهوتي ببطء... أبتسم للقمر فيبتسم لي...
يعم السلام... أشعر بالأمان... ويتوقف الزمن...   

والفراق دايما يبدأ بكلمة

- هو احنا ليه بقينا ساكتين كدا
- عشان الصمت أدفأ من الكلام
- بس الكلام أوقات بيدفي أكتر من السكات
- والكلام أوقات بيجرح أكتر م السكات
- للدرجادي بعدنا؟
- القرب مش محتاج كلام...
- بس البعد محتاج سكات...
- الخناق دايما مليان كلام...
- والخصام دايما مليان سكات...
- والفراق دايما يبدأ بكلمة اتقالت...
- والفراق أوقات يبدأ بكلمة ماتقالتش...

فاللعنة على المال...عن قصص حقيقية

أغمضت عيناها اشتياقا...
نعم فهي دائما تراه كلما أغمضت عيناها...تمنت لو تغمضهما طوال الوقت حتى لا يغيب عن ناظريها...
همهمت: الى متى الغياب...وما الجدوى من كل كنوز الدنيا ان لم يجمعنا المكان...
الأيام تمر...والعمر ينقضي...
فهل انطفأ الحب داخلك...أم أصبحت أكثر عشقا للمال؟
أتذكر حين تعاهدنا بألا نفترق...ثم نكثت عهدك...
أتذكر حين تعاهدنا بألا يطول الغياب...ثم طال ...
أتذكر وتذكر وتذكر؟
هناك الكثير في حياتي لا تعلم عنه شيئا...
أتدري...كم من اللحظات الصعبة مرت بي وأنا هنا وحدي...كان يكفيني أن تنظر الي لتطمئنني بان كل شئ سيكون على مايرام مادمت بجانبي ...
أولادنا كبروا...كبروا كثيرا...يسألون عنك في كل لحظة... أولم تشتاق اليهم؟
أتعلم...أخاف أن أصحو يوما ولا أذكرك...نعم ستصبح كأن لم تكن...ولن يبق من ذكراك سوى ملامحك في وجوه أولادنا...
نعم سأنساك...وأنسى انني أحببتك يوما...
سأنسى كم انتظرتك...واشتياقي اليك...
سأنسى كل ماضاع من عمري في انتظارك...
وسأحيا بدونك...دون أن اتنفسك...دون أن اشتاق اليك...ودون وعودك....
سأحيا بدونك...نعم سأحيا....

حدود الهذيان 2

فات اسبوع من بعد اليوم اللي كان عامل نفسه مختلف، وف الاخر طلع زيه زي غيره...
المهم...انا صحيت النهارده وماعنديش احساس بأي حاجة...خالص...
حالة من البلاهة المبالغ فيها...الحالة دي بتبقى حلوة لما حد ييجي يحرق دمك...حلوة أوي...
غسلت وشي ف نص ساعة تقريبا، قضيت معظمها بتأمل ف الحنفية...
وبعدين عملت كوباية شاي بلبن وفتحت الراديو...وايه ده...الله...دا محمد قنديل...
ماما: انتي مش رايحه الشغل؟
أنا: اه رايحه ان شاء الله
ماما: طب ماتلبسي..انتي هاتتأخري كده
أنا: اه ما أنا هالبس اهو!
فتحت الدولاب اتأمل هالبس ايه على صوت فيروز...الصراحة عملتلي دماغ مع الشاي بلبن...
وبعد كتير خلصت لبس...وللمرة الألف سألت ماما:
مش عايزاني اقعد معاكي النهارده؟

والحلوة دي قامت تعجن في البدرية

 الحلوة دي قامت تعجن في البدرية
و الديك بيدن كوكو كوكو في الفجرية
يلا بنا على باب الله ياصنيعيه
يجعل صباحك صباح الخير ياسطه عطيه

الحلوة دي قامت تعجن ف البدرية...
هي صحيت الاول صلت الفجر وبعدين جابت طبق تعجن فيه شوية قرص من اللي بالشمر دي...الله عليها مع الشاي باللبن...

الشمر ده بتجيبوا من عطار اسمه أبو صلاح...راجل أمين وكل البضاعة اللي عنده دايماً طازة....

أبو صلاح كان نفسه إن صلاح ابنه يشرب منه الصنعة عشان يشيل عنه لما يكبر...بس صلاح عاوز يطلع مهندس....ملوش ف التجارة...

والديك بيدن كوكو كوكو ف الفجرية...
أصل الجيران كانوا مربيين شوية بط وفراخ على السطوح...وياما الناس اللي ف الشارع اشتكوا...وتييجي البلدية تلم كل الطيور اللي عندهم ويدفعوهم غرامة...وبرضوا يرجعوا يربوا غيرهم...
وبعدين الديك بتاعهم بيقول كوكو طول اليوم مش الفجر بس...

يلا بينا على باب الله يا صنايعيه...
المنطقة كلها أصلا مافيهاش غير صنايعي واحد: الأسطى حسن، ودا كان ف الأول كهربائي واخد الصنعة أبا عن جد...بس مع التطور بقى فني دش...
ودا مش محتاج يقوم يشتغل من الفجر...مين اللي هايطلب فني دش ف الفجر؟ هو بيفتح المحل على الظهر كدا ويقفل على نص الليل....
ويوم بيبقى الشغل كتير أوي ويوم مافيش...بس ماشي الحال وربنا بيرزق...
 الأسطى حسن لسه ماتجوزش...مش ظروف مادية ولا حاجة، دا حتى عنده شقة ايجار قديم قاعد فيها من بعد ما أبوه مات من خمس سنين، وكمان ما عندوش اخوات...يعني المحل والبيت ليه لوحده...
كل الحكاية انه كان خاطب واحدة بيحبها اسمها نادية...بس أهلها كانوا باصين ف العالي وهي كانت زيهم ورضيت تسيبه لما جالها واحد أغنى منه...باعت حب سنتين عشان الفلوس...
ومن ساعتها وهو حلف عمره ما هايحب تاني....

يجعل صباحك صباح الخير ياأسطى عطية...
أسطى عطية دا أبو الأسطى حسن...وكان متجوز ست طببة أوي: الحاجة أم حسن...الله يرحمها كانت ست جدعة وعاشت مع الأسطى عطية على الحلوة والمرة...وياما وقفت جنبه ف وقت الشدة...دا حتى ف مرة كان عليهم ديون والمحل هايتباع، راحت باعت كل دهبها وكل اللي شايلاه لجهاز البت ( أصلها كانت نفسها تجيب بنت بعد حسن بس ربنا ما أرادش)...
وكان كل يوم الأسطى عطية يصحى من الفجر وينزل يشوف أكل عيشه، فتدعيله أم حسن: "ربنا يفتحها ف وشك، ويجعل صباحك صباح الخير يا أسطى عطية"...

والحلوة دي قامت تعجن في البدرية
و الديك بيدن كوكوكوكو في الفجرية
يلا بنا على باب الله ياصنيعيه
يجعل صباحك صباح الخير ياسطه عطيه
*****
طلع النهار فتــاح ياعليم
والجيب مافهشى ولا مليم
مين فى اليومين دول شاف تلطيـم
زى الصـنايعية المظاليـم
الصبر أمره طـال
من بعد وقف الحال
ياللى معاك المال
برضه الفقيـر له رب كريم 

*****
ما تشد حيلك يا بو صلاح
 إضربها صرمة تعيش مرتاح
 خلى تكالك ع الفتاح
يلا بنا يلا الوقت اهو راح
********

الشمس طلعــت والمــــــلك لله

ما تشيل قدومك والعـــدة ويلا

اجــرى لرزقك خليها علىالله

********
الحلوه دي قامت تعجن في البدرية
و الديك بيدن كوكوكوكو في الفجرية
يلا بنا على باب الله ياصنيعيه
يجعل صباحك صباح الخير ياسطه عطيه

كبت الساعات

الوقت بيمر ببطء...وأوقات تحسه مابيمرش أصلا...
الثانية تعدي ف سنة...
يدق قلبك يسبق عقارب الساعات...
يعلى صوت السكات...يعزف جواك حنين...
تتلخبط جواك شوية مشاعر...
خوف على شوية كسوف...أو خوف على شوية فرح وأمل...أو أمل مع حبة اشتياق...أو حاجات كتير...تشكيلة كده...
بس التشكيلة دي عمرها ما هاتتخلى عن أبيها الروحي: القلق...
في الانتظار بتعرف قيمة اللي انت مستنيه...وبتحلف عمرك ماهتفرط فيه، بس يرجع...بس ربنا يشفيه...بس يتحقق...بس نلاقيه، وساعتها عمرنا...عمرنا ماهنفرط فيه...

الدنيا ومافيها

عارف لما تبصلي وتقولي "ربنا يحميكي يا بنتي"...
طب عارف لما تبتسملي و تاخدني ف حضنها من سكات....
....بالدنيا ومافيها...

انهم ببيعون الوهم...

هذه الأيام وعلى كثير من قنوات التلفزيون، يظهركائن ليست له أي صفة طبية ممسكا بزجاجة من "البونبوني" الملون - الشبيه ب"الشيكوبون" - متدعيا بأنه دواء لعلاج فيروس سي!...
لا ألوم من يشتري هذا الدواء...فكم من مريض تقطعت بهم السبل بين الأطباء وأصبحوا يتشبثون بأي أمل؛ حتى لو كانوا متأكدين أنه أمل كاذب...
بل ألوم كل من سمح لهذا النصاب بأن يخرج علينا بأكاذيبه تلك؛ ألوم كل مسئول تنائى عن ردع هذا المخادع وكل أمثاله من الدجالين، ألوم كل من سمح بهذه المهازل الاعلانية لمجرد انها "بتجيب فلوس"!!

يا أبيض يا أسود

في مسرحية شاهد ماشفش حاجة، كان في مشهد في المحكمة والشاهد - اللي هو عادل امام - واقف قدام القاضي وكل ما القاضي يسأل الشاهد على حاجة يرد عليه باجابات عايمة...فالقاضي قاله "انا عايز اجابات واضحة يا ابيض يا اسود، الاجابات الرمادي دي انا مابحبهاش"...
اللي فكرني بالمشهد دا اني اكتشفت يا سادة ان حاجات كتير ف حياتي "رمادي"
يعني فيه حاجات احيانا ببقى عايزاها واوقات تانيه لا...وحاجات ببقى مش عارفة اذا كنت اصلا عايزاها ولا لا...
الحاجات دي ممكن تبقى أحلام، أشخاص، توجهات سياسية، شغل، أو أي حاجة...
ولما قررت اقعد مع نفسي لقيتني مستسلمة لكونها "رمادية" ومش عارفة احولها لأي لون تاني...
فقعدت مع نفسي قعدة تانية وبرضه ماطلعتش بأي تغيير...

وتكررت القعدات وبرضه مافيش فايدة...وكأن الحاجات الرمادية دي بتطلعلي لسانها...
استفزتني...يا أنا يا هي بقى...قعدنا تاني...
والخلاصة: انا - غالبا - ماليش سيطرة على الحاجات الرمادية دي...هي بتتحول من تلقاء نفسها وبمزاجها لأبيض أو أسود أو حتى بمبى!
ممكن أرجوكي تنجزي وتتحولي?

احساس كده

عارف احساس انك بجد مش عايز حاجة من الدنيا غير رضا ربنا عليك وابتسامة أمك?...بيريح اوي..

حدود الهذيان 1

صباح الجمال...
النهارده صحيت من النوم وأنا متأكدة انه هايبقى يوم مختلف...من غير ليه...لأني - ببساطة - معرفش ليه...
النهاردة لازم يكون مختلف...
فات نص اليوم تقريبا وكانت كل الأحداث عادية...عادية بزيادة!
بس لسه فاضل النص التاني وأكيد أكيد الاختلاف هايكون فيه...
تنتابني حالة ترقب شديدة، محاولة الانبهار بأي حدث...ولكن الأحداث "المختلفة" لا تأتي حينما نتربص لها...انها تفضل دوما أن تأتي على غفلة وبدون سابق انذار...

منتهى الوحدة

أصبحت أكثر عشقا لساعات الوحدة...ليست مملة; ولم تكن يوما...
انها تزداد بريقا...تزداد جمالا...تزداد حميمية...
في الوحدة اقابلني...اتحدث مع ذاتي كما لم احدث احدا من قبل...اتودد الى نفسي..احنو عليها...اواسيها ولربما ارسم البسمة على شفاهها...اعاتبها...اثور عليها..ولربما ابكيها...
في الوحدة قد احب ذاتي وقد اكرهها...
في الوحدة اقابل كل من اتمنى رؤيته...مهما كان بعيدا...يطول الحديث...تتلاشى الخلافات...وتتراءى الذكريات...
في الوحدة احلم كما يحلو لي...اكتب اشعار...اغني وارقص...اناجي الطيور ف السماء ويداعبني ضوء القمر...
في الوحدة افعل ما اشاء...احدث من اشاء...احلم بما اشاء...واكون كما اشاء...

عندما تصبح الأحلام موحشة

اعتدت - كحال الجميع - أن تأخذني أحلامي وتحلق بي بعيدا...يدفعني جمالها وبريقها الى بذل المزيد من الجهد لتحقيقها...ومع التحلي بقدر من الصبر والمثابرة سأصل اليها يوما...
الأحلام جميلة...والأجمل هو لحظة الوصول اليها بعد عناء طويل...
ولكن جل ما يحيرني أن أجد أحلامي أكثر يأسا من الواقع...
الأحلام التي طالما ارتقت بي الى السماء، كيف لها أن تشد وثاقي لتشدني بقوة نحو الأرض...كيف لها أن تمنعني عن التحليق...كيف لها أن تكبل حريتي...كيف لها أن تجعل الحياة مريرة... كيف لها أن تجعلني انحني...
تلك الأحلام لم تعد كأحلامي...
فيا من توحشت أحلامك...راجع أحلامك...الأحلام خلقت لنا لا علينا...لترتقي بنا وتسعدنا لا لتشقينا...
ويا من كسرتك أحلامك... فلترحل عنك تلك الأحلام...وان أصرت على البقاء، فلا تسميها أحلاما؛ بل أضغاث أحلام...
حاربها بصلواتك....بأصدقائك...حاربها بالواقع...حاربها بأحلام أخرى...ولكن هذه المرة بأحلام حقيقية...

ابتسامة واحدة تكفي

عن ناس مابنشبعش منهم اتحدث...
ناس كده وانت معاهم تتمنى الزمن يقف...وتتمنى تفضل باصصلهم على طول...
ناس ضحكتهم بتخلي الشمس تطلع...
ولما يبتسموا نحس ان كل وجعنا راح...
ناس مجرد وجودهم بيخلينا نحس بالامان...
ربنا يخليهم لينا...

مابتتحكيش اصلا

ما هو اصل فيه حاجات كده ما بتتحكيش....
بتفضل جواك وما بتطلعش...ما هو انك تحكيها مش هايحل المشكلة ومش هايطلعك من اللي انت فيه...يبقى خلي اللي جواك يفضل جواك احسن...

برغم كل شئ...ابتسم

اكيد سمعت عن الناس اللي بيبقوا ف محن ومشاكل وبالرغم من كده تلاقيهم بيضحكوا ف وش الناس التانيين... 

 على فكرة مش مجانين ولا بوشين..
. بس يمكن مؤمنين اوي وراضيين باللي ربنا كاتبه وصابرين على الابتلاء من غير شكوى عشان الاجر عند ربنا?...يمكن...
ولا يمكن الناس دي عارفين ان كل واحد عنده اللي مكفيه ومش ناقص يزود هموم غيره?...برضه يمكن...
او يمكن كل واحد منهم تعبان جدا لدرجة انه مش هايستحمل حد يسغأله عن اللي مضايقه?...برضه جايز...
ايا كان السبب..مش مهم...المهم هو انك ماتفضلش تشتكي عمال على بطال...
عاوز تفضفض او تشتكي حقك...بس مع اصحابك مع اهلك مع ربنا مع مديرك اللي انت عايزه... بس اللي ماشيين ف الشارع مالهمش ذنب تكئبهم ... حاول تبتسم ف وشهم هاتحس انك احسن وهما كمان هايحسوا انهم احسن...
وكل ما تلاقي نفسك مكشر ف وش واحد مالوش ذنب افتكر انك عايش احسن من ناس كتير..كفايه انك لسه عايش...وابتسم! :(

البعيد عن العين...

يدعي الكثيرين ان "البعيد عن العين بعيد عن القلب"...
بالنسبالي شايفة ان المقولة دي غالبا غلط... والحالة الوحيدة اللي بتكون فيها صحيحة ان البعيد عن العين ده كان ف العين "فقط" وعمره ما كان ف القلب...
اللي ف القلب بيفضل ف القلب مهما غاب...بتشوف ملامحه ف وشوش الناس كلها...بيبقى دايما على بالك وبتراعي مشاعره وكرامته حتى وهو مش موجود....
على العكس بقى...ممكن انسان يبقى قدامك ليل نهار وتبقى مش شايفه خالص ولا حاسس بوجوده.... ما هو لازم يدخل قلبك الاول عشان عينك تقدر تشوفه...
يعني المقولة اللي فوق المفروض تبقى "البعيد عن القلب بعيد عن العين"....

الكوابيس النسبية

اعترف باني شخصية حالمة...بحلم وانا فرحانة...وانا متضايقة ...وانا ماشية...وانا باكل...وانا باتكلم...وانا باشتغل...وطبعا وانا نايمة....
يمكن تصنيف تلك الاحلام ما بين متناهية الصغر، واللامحددودة...
الاحلام ديه هي اللي بتخليك قادر تكمل حياتك رغم الصعاب...وهي اللي بتخليك تعرف تنام عشان عندك امل ف بكره...
احلامك بتقويك...بتعيشك ف حدوتة انت اللي راسم ملامحها بايدك....بتنسيك كل الوجع اللي فات...وتلونلك كل العمر الجاي...
ومش لازم كل الاحلام ديه تتحقق...عشان فيه منها ماينفعش اصلا يتحقق، او يمكن عشان ربنا بيبعد عنك الشر اللي ممكن يحصلك لو احلامك بقت حقيقة....
مش كل حاجة بنحلم بيها هاتحلي الايام فعلا...فيه احلام جمالها ف انها تفضل احلام...ولو اتحققت ممكن تقلب كوابيس...
كل ده مش مهم...برضه احلم...احلم للي فات ولكل اللي جاي...احلم ليك ولكل الناس...احلم للكون...ارسم دنيتك زي مابتتمناها....حاول مرة واتنين ومليون...يمكن ف يوم حلمك يتحول لاحلى حقيقة...ولو ماتحققش اعرف انه يمكن..جايز...كان كابوس لابس وش حلم جميل...
ماهو اصل الاحلام ديه حاجه نسبية...ممكن نفس الحلم انت تشوفه جنة وغيرك يشوفه كابوس...
بس برضه احلم...

حالة كدة

ينتابني الأن شعور مشوش ... اعتدت أن يزورني بين الحين والاخر...

شعور بعدم الرغبة في الحديث...وبأن عينيك توشكان أن تدمعا في اية لحظة... 

تجلس بين أصدقائك صامتاً متمنياً ألا يباغتك احدهم بذاك السؤال "مالك؟"...تقرر أن تتخلى عن صمتك محاولاً خداعهم بأنك "زي الفل"...فيصدقك البعض...

احدهم "يفقسك" فيسألك: "ماذا بك؟"..

فتجيب:"لا شيء..أنا مجهد قليلاً فقط"...

ينظر إليك صديقك في صمت...تكاد عيناه تنطق "أعلم أنك كاذب"...لا يلح في السؤال فهو يعرف جيداً أنك لن تبوح بما بداخلك مهما حاول...يبتسم لك ثم يكمل حديثه مع بقية الأصديقاء...

تترك المجلس مبكراً...لا إلى المنزل ولا إلى أي مكان أخر...تسير هائماً في الطرقات تفكر بكل شيء...تطاردك مخاوفك جميعها...وتحلق حولك أحلامك...تسقط دمعة رغماً عنك...لا تبالي بمن حولك...

 تسير كثيراً...لا تمل..لا تتعب...

تنظر إلى السماء...فتمتليء عيناك بضي القمر...ترتسم على شفاهك بسمة...تضع يديك في جيوبك...وتكمل الطريق....

 

 

متفائلة

متفائلة أنا...

  تربطني- غالباً - علاقة وطيدة بالتفاؤل... مؤمنة بأن  غداً يومٌ أفضل ؛أو على الأقل ليس بالأسوأ...

على النقيض؛ أحاول أن اتوقع كل الأمور السيئة التي يمكن - أو حتى يستحيل - حدوثها؛ في محاولة لتحصين نفسي من الصدمات وهذا أيضاً درب من دروب التفاؤل...

التفاؤل ليس فقط أن تؤمن بأن السعادة اتية...

التفاؤل هو الايمان بأن كل الامور السيئة هي في الأصل خير من عند الله ...

التفاؤل هو أن ترى الخير في كل ما يصيبك....

التفاؤل هو أن تتوكل على الله....

التفاؤل هو أن تيقن أنه لو اجتمعت الامة على أن ينفعوك أو يضروك بشيء فلن يصيبك إلا ما كتب الله....

التفاؤل هو أن تؤمن بكل جوارحك أن "وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ" ....

نعم ...اللَّهُ يَعْلَمُ وَأَنْتُمْ لَا تَعْلَمُونَ...